Sweden hmeichhe PM hmasa ber ruat a nih hnu reiloteah bang nghal

Sweden-a hmeichhe Prime Minister hmasa ber Magdalena Andersson chu lakluh a nih hnu lawkah, Parliament-ah a kaihhruai sorkar budget proposal thehluh hnawl a, a aiah eptu party lam thehluh pawm a nih avangin Nilaini khan PM a nihna aṭanga banna a thehluh zui leh nghal.

Social Democratic party hruaitu, Andersson hian darkar sarih chuang awrh chauh PM dinhmun a chelh hnuah, a tan ban mai hi a ṭha zawk tih a sawi a ni. "Ka tan chuan hei hi zahna lantirna a ni. Sorkar rin tawk loh hruaitu nih hi ka duh lo a ni," a ti. PM atana lakluh a nih hmaa finance ministry changtu, Andersson chuan Parliament speaker Andras Norlen hnenah Social Democratic-in party mal sorkar kaihhruai chu a inpeih reng thu a hrilh nghal bawk.

Seat 349 awmna, Sweden Parliament speaker Norlen chuan an awm zel dan tur ngaihtuahin party pariat hruaitute chu a biak tur thu a sawi a, an kal zel dan tur pawh puanchhuah thuai a ni ang, a ti.

Parliament-a sorkarin budget proposal a thehluh hi Social Demcoratic party-in ṭangrual sorkar a siampui, Green Party chuan a pawmpui ve lo a, hei vang hian eptu party lam rawtna thehluh chu a tlang ta zawk a ni. Mahse Green Party chuan prime minister thlanna neih leh hunah Andersson thlawp zawnga an vote leh tur thu an sawi.

Andersson chuan a hmain eptute budget siam hmang pawhin ram kaihhruai tho a tum thu a lo sawi tawh a ni Parliament-a budget pawm tak hi sorkarin a siam zulzuia siam tho a ni a, mahse sorkarin an ram dinhmun siamṭhatna atana nakkum chhunga hman tura a ruahman kronor tluklehdingawn 74 (USD tld 8.2) aṭangin kronor tld 20 (USD tld 2.2) chauh an hmang thei dawn thung. Hei bakah budget pawm takah hian chhiah lak tihhniamna tur te, police officer-te hlawh tihsanna tur leh judiciary system hnuaia sector hrang hranga sum tam zawk dahna turte pawh a tel a ni.