Philippines President thusawiin Catholic-te ti thinur

A khingpui leh amah eptute chungchang ṭawngkam mawilo leh huatthlala taka sawi fo ṭhin, Philippines President Rodrigo Duterte chuan Pathian chu 'mawl lutuk' tiin a sawi a, hei hian an rama Catholic kohhrante a ti thinur hle.

Davoa khuaa thu a sawiah, Duterte chuan Bible-a Adam-a leh Evi te suala an tluk dan chungchang a inziah dan chu sawiselin, Kristian ten pianpui sualna an pawm dan te chu a sawisel a ni. President thusawi hi kohhran leh mimal eng emaw zatin an sawisel nghal a, mahse President office chuan a thlavang lo hauhsakin a mimal rin dan mai a nih thu a sawi.

Duterte hian a hma pawhin Roman Catholic kohhran hotu, Pope pawh

ṭawngkam chhe takin a lo sawisel tawh bawk a ni.

TV-a thu a sawinaah Duterte chuan Bible-a Adama leh Evi chanchin tarlan, thei ei thiang lo an ei avanga Eden huan aṭanga hnawhchhuah an nih dan chungchang chu sawiin, "He Pathian mawl lutuk hi tunge ni?' tiin a sawi. "Thil ṭha takin i siam a, mahse a hnuah i hnathawh ṭha tak chu i tichhe leh a ni", tiin Pathian chu a chhal let a ni. Adam leh Evi te tihsual avanga mihringte sualna neia piang ni anga Kristiante rin dan pawh sawiselin, "Hei hi eng ang sakhua nge ni ngai? Ka pawm ve thei lo a ni" a ti.

Catholic bishop Arturo Bastes chuan President chu a a tawh nia sawiin, sakhaw sawichhiat leh rawng tak a rorel ṭhin a tihtawp theihna tura a tana ṭawng-

ṭai sak turin mipuite a ngen. Phillipines ram mipui maktaduai 100 vel zinga 80% vel zet hi Catholic kohhran an ni.