US state 17-in sorkar khing

US President Donald Trump-a kaihhruai sorkarin dan loa an rama pemluh tumte laka khauh zawk hma la a, dan loa lutte chhungkuate a ṭhendarh avangin US state 17-in sorkar an khing.

Sorkar khingtu zingah hian Washington, New York leh California te pawh an tel.

US thuneitute chuan Mexico nen an ramri kaltlanga dan loa US-a lut zinga puitling chin chu manin, an fa naupang kum tling lote lak aṭangin lak hran an ni. Hei hian sawisel a hlawh nasa hle a, kar hmasa khan naupang leh an chhungte ṭhendarhte hi titawp turin President Trump chuan thupek a tichhuak a, hemi hnu hian naupang eng emaw zat chu an chhungte nen inhmukhawm tir an ni tawh. Midangte pawh ni 30 chhungin an chhungte nen inhmuhkhawm tir vek turin California judge chuan a ti a ni.

Brazil tlawha zin, US Vice President Mike Pence chuan document mumal nei loa dan loa US-a pem luh tumte chu an fate, naupangte dinhmun hlauhawm taka dah tur zawnga thil ti lo turin a ngen. Mike Pence chuan dan anga an lut thei lo anih chuan, US-a luh chu tum rih lo mai turin a ngen.