Pakistan NSA a bang

Pakistan National Security Advisor Lt Gen (retd) Nasser Janjua chu an ram Prime Minister lailawk Nasirl Mulk nen an inmil loh avangin a bang.

Janjua hian Nilaini khan PM hnenah a banna hi a thehlut a, PM hian a lo pawmsak nghal niin Cabinet Division thuchhuah chuan a tarlang.

Southern command hotu hlui, Nassser Janjua hi PM aṭanga ban tak, Nawaz Sharif-a khan kum 2015 October thla khan NSA atan hian a ruat a, minister of state status pek a ni. A banna chhan tak hi sawichian ni lo mah se, chief justice hlui Mulk-a kaihhruai sorkar nen hian an inmil lo hle a, a thawhpui thei tawh lo nia sawi a ni.

Caretaker PM Mulk chuan Janjua-a banna hi pawm mah se a thlaktu tur a puan a la ni lo.

Janjua hi Pakistan leh Afghanistan inkar boruak siamṭhatna kawngah mi pawimawh tak a ni a, kumin kumtir lam khan ram pahnihte inkara inremna leh muanna a awm theih nana hma lakna tur pawh a lo siam tawh a ni. Kum 2017 December thla khan PM hlui Shahid Khaqan Abbasi chuan Janjua hi national security policy pharh tur pawhin a lo sawm tawh a ni.

Sipai official zingah Janjua hi NSA dinhmun chelh thei pahnihna a ni a, a hmain Major General (retd.) Mehmood Durrani chu ruat a lo ni tawh bawk.