Maryland: Newspaper office beihnaah mi 5 thi

US-a Maryland state khawpui Annapolis khuaa local newspaper office chu Ningani khan mi pakhat silai kengin a bei a, mi panga kaphlumin midang eng emaw zatin hliam an tuar.

Annapolis-a Capital Gazette office staff-te chuan an office beitu hian shotgun kengin grenade a tipuak a, hemi hnu hian newsroom chu darthlalang chhanah a kap zui ta niin an sawi. Newspaper office awmna buildingah hian sumdawnna hmun dangte pawh a awm tel a, police-te chuan he buildinga awm mi 170 chuangte chu an hruaichhuak nghal a ni.

Pawikhawihtu hi Jarrod Ramos nia sawi a ni a, police-ten an man tawh a, office a beih chhan hi sawichian ala ni lo. Thurualpui a nei lo nia sawi a ni. Mahse media lam chuan kum 2012 khan Ramos hian newspaper group hi amah tihhmingchhia puhin alo khing tawh a, mahse a khing hlawhtling lo a ni. The Capital hian kum 2011 khan Ramos-a laka criminal harassment case siamsak a nih chungchang alo report tawh a ni.

Capital Gazette hian local newspapers eng emaw zat a tichhuak a, heng zingah hian kum 1884 aṭanga tihchhuah nitin chhuak The Capital pawh a tel. A neitu hi Baltimore Sun Media Group a ni.

President Donald Trump chuan newspaper office beih a nih chu a dem thu sawiin, thi chhungte a tawrhpui thu a sawi.

He pawikhawihna thleng avang hian silai khuahkhirhna khauh zawk siam tura nawrna a nasa zui nghal hle. Khawvel puma civil mi zinga silai license nei maktaduai 857 zinga maktaduai 393 chu United States a awm an ni.