Africa ramah Covid-19 variant thar hmuchhuak ; WHO-in emergency meeting a ko

South Africa leh Botswana ramah Covid-19 hri chi thar, inkaidarh awlsam tak hmuh chhuah thar a ni leh. Hei variant thar hi a hmaa variant dang lo hmuh chhuah tawhte aiin inkaidarh a awlsam zawk a, vaccine pawhin hri chi dang aiin a do hneh lo zawk bawk nia sawi a ni.

Covid variant thar hmuh chhuah a nih leh avangin World Health Organisation (WHO) chuan nimin khan Geneva-ah emergency meeting a ko nghal a ni.

South African National Institute of Infectious Diseases chuan variant thar kai hi South Africa, Botswana leh Hong Kong-ah mi 59 hmuh chhuah an ni tawh tih a sawi.

Variant hmuh chhuah thar hi Covid hri hmuhchhuah tawh zinga inthlak danglam nasa ber leh hlauhawm ber nia sawi a ni a, Delta variant ai pawhin a hlauhawm zawk dawn niin an sawi. He hri thar hi a hming vuah a la ni loa, 'Nu' tia vuah a ni dawn nia sawi a ni bawk.

Virologist Dr Tom Peacok chuan variant hmuh chhuah thara hri inthlak danglam dan hi a ṭha lo hle tih sawiin, a scientific name B.1.1.529 hi a hmaa hri dangte zawng aiin a hlauhawm zawk thei tih a sawi.

Ram hrang hrangten khuahkhirhna siam nghal
South Africa-a Covid variant thar hmuh chhuah a nih vang hian United Kingdom chuan Africa ram paruk - South Africa, Namibia, Zimbabwe, Botswana, Lesotho leh Eswatini-te chu nimin khan red list-ah dah nghalin, heng ram aṭang hian thlawhtheihna luh a khap.

Israel pawhin heng ram paruk bakah Mozambique ram telin, Israel mite chu zin lo turin a hriattir nghal a ni.

Australia chuan variant thar hi Delta variant aia a hlauhawm zawk tih finfiah a nih chuan South Africa nena an ramri pawh a khar nghal tur thu a sawi. Health ministry Greg Hung chuan B.1.1.529 kai hi an ramah la awm lo mah se, health expert-ten an hlauthawn a nih chuan inzinpawhna lamah khuahkhirhna an siam thuai tur thu a sawi bawk.

Singapore health ministry pawhin venthawn thilah South Africa leh a chhehvel ram aṭangin an ramah khualzin luh an khap nghal tih a sawi.

Japan ram chuan South Africa leh Africa ram dang panga aṭanga khualzin lut turte tan khuahkhirhna a siam nghal bawk a ni.

Taiwan chuan Africa chhim lam ram aṭanga lutte chu sorkarin quarantine facility a siamah ni 14 chhung inkhunghrang turin a ti.

Italy chuan ni 14 liam ta chhunga Africa chhim lam rama kalte chu an rama luh a khap nghal bawk.

Germany pawhin nizan aṭang khan South Africa leh a ṭhenawm ram aṭanga khualzin luh a khap a, heng ram aṭanga German mi hawte chu vaccine dose kima la pawh ni 14 chhung inkhung hrang turin a ti.

European Union hotu Ursula Von der Leyen pawhin Covid variant thar hmuhchhuah vangin EU member ramte chuan Africa chhim lam biala zin khapna tur khuahkhirhna siam dan tur an ngaihtuah dawn tih a sawi bawk.