Trump-a immigration policy duh lohna lantir

US President Donald Trump-a kaihhruai sorkarin dan loa an rama pem lutte danna tura dan khauh zawk a siam chu duh loin Inrinni khan US ram chhung hmun hrang hranga lungawi lohna lantir a ni. Immigration policy hmang hian dan loa US ramri kana lut, mi eng emaw zat man an ni a, an fate naupang kumtling lo 2,000 chuang zet an nu leh pa te lak aṭangin lakhran an ni.

Nawrh huaihawtute chuan ram chhung hmun hrang hranga nawrh hi huaihawt a nih thu sawiin, Washington DC-ah a nawrhna pui ber chu neih a ni, a ti. Mipuite chu he policy sawisel hlawh tak hi an duh lohna lantir chhunzawm zel turin an ngen bawk.

MoveOn.org thupuangtu Karthik Ganapathy chuan pem luh tum chhungkua buaina chu a la reh mai lo tih a sawi a, Trump-a kaihhruai sorkar chuan naupang lakhrante chu an chhungte nen inhmuhtir leh tawh mah se, naupangte leh an chhungte chu hren chhunzawm zel a la tum a ni, a ti.

Nawrh huaihawtte hian, "Chhungkua ṭhendarh theih an ni lo", "Tumah dan loa lut an awm lo", "Naupangte tihrehawmna titawp rawh" tih thu ziakte an keng a, US-a pemluh tum chhungkua te laka US sorkar chetdan rawng tak chu an pawm loh thu an aupui bawk.