UN-Myanmar inremna siam Rohingya tan lawmna awm lo

United Nations leh Myanmar sorkarin inremna an siamah Rohingya Muslim-te tana lawmna tur a awm lo a, citizenship pekna tur leh Myanmar ram chhunga zalen taka an chet vel phalsakna tur engmah telh a ni lo tiin Reuters chuan a tarlang.

Myanmar aṭanga Bangladesh-a Rohingya Muslim tlanchhiate chu Myanmar ramah him taka hruai kir an nih leh theihna turin May thla tawp lam khan UN chuan Myanmar sorkar hi inremna a lo siampui tawh a ni. He inremna kimchang hi mipui hriatah puanzar a ni lo a, mahse Reuters hian Zirtawpni khan MoU ziah hi a hmu a, online lamah pawh a putchhuak bawk.

MoU an siamah hian Bangladesh aṭanga Rohingya raltlan hruai kirte chu Rakhine state-ah Myanmar ram mi dangte an bawkin dan leh thupek hnuaiah zalen taka an chet vel phalsak an ni a, mahse Rakhine state pawn lam chin chungchang erawh tarlan tel a ni lo. Hei bakah hian Myanmar khua leh tui nihna, citizenship pek chungchang pawh sawilan tel a ni lo. Myanmar sorkar chuan Rohingya hnamte hi a ram mi dik takah pawm loin, tun thlengin citizenship a la pe duh lo a ni.