Trump-a thusawi vangin Estonia-a US ambassador a bang

Estonia rama US ambassador, James D Melville chu an thawhpui, Europe ramte chungchanga US President Donald Trump-a thusawi danah a lungawi loh avangin a bang.

President Trump hian NATO hminga an thawhhonaa an sum sensote chu Europe ramte chuan dik lo takin US an tumtir niin a lo puh tawh a ni. Hei bakah hian EU industry ṭhenkhatte chhiah chawitir na tur a siam bawk.

US diplomat ṭhenkhat chu President Trump-a laka lungawi loin tunhnaiah an lo bang tawh bawk a, January thla khan Panama-a US ambassador John Feeley chuan President Trump-a hnuaiah a thawk chhunzawm thei tawh lo tih sawiin a bang tawh bawk a ni.

Foreign Policy in a tarlan danin, Melville hian President Trump-an EU chuan US chu sum lama hman ṭangkai a tum tih a sawi leh, NATO chu Nafta [the North American Free Trade Agreement] ang bawka ṭha lo a ni tih a sawi chu thu dik lo a ni chuang lo a, mahse a tan chuan President Trump-a hnuaia a thawh chu a titawp a hun ta tihchianna a nih thu a sawi. Melville hi Estonia ambassasor atan hian president hmasa Barack Obama ruat a ni a, kum 2015 aṭang khan he hna hi a thawk a ni. Hemi hma hian Europe ram hrang hrangah senior diplomat post a lo chelh kual tawh bawk.