Mexico President atan Lopez Obrador thlang

3rd July, 2018

Pathiannia Mexico President thar thlanna neihah left-wing candidate Andres Manuel Lopez Obrador chu thlan tlin a ni.

Electoral official-te chuan Mexico City mayor hlui, Obrador hian vote tla aṭangin 53% a hmu pha niin a sawi a, candidate dang zinga a vote hmuh zahve hmu pha an awm lo. President thlannaah hian candidate pali an awm a, candidate dangte chuan an chak loh an pawm thu sawiin, Obrador an lawmpui thu an sawi.

Rorellai, PRI party canidate Jose Antonio Meade chu pathumna a ni pha chauh a, Obrador chu a lawmpui thu sawiin, hlawhtlinna ropui tak a chan chhoh zel a beisei thu a sawi.

President atana thlan thar, kum 64 mi Lopez Obrador hi kum 2012 leh 2006-a president thlanah khan chuhin, runner-up a lo ni tawh a ni. Inthlan dawna a campaign-naah an ram sum dihmun siam ṭhat, eirukna umbo, hnathawktute hlawh leh pension tihsan te, mipuite dinhmun inthlau lutuk siamṭhat te chu a auhla berah a hmang a ni.

Mexico President thar tur Lopez Obrador hian kum 1976 khan politics khel ṭanin, Institutional Revolutionary Party (PR) a zawm a, kum 1989-ah Party of the Democratic Revolution (PRD) zawmin kum 1996-1999 chhung khan party hotu a ni. 2000 kumah Mexico City mayor atan thlan tlin a ni. Kum 2005 khan President thlannaa chuh a tum avangin Mexico City mayor aṭangin a bang a, President thlannah hian PRD kaihhruai ṭangrual pawl hmangin chuh mah se vote 0.58% in a tling zo lo a ni.

Kum 2012-a President thlannaah PrD, Labor Party leh Citizens' Movement ṭangrual hmingin a chuh leh a, mahse hemi ṭum pawh hian a tling zo lo leh a ni. Hemi kum vek hian PRD chhuahsan lehin, 2014 khan party thar National Regeneration Movement (MORENA) a din. Kumin inthlanah hian Obrador hian a party, MORENA bakah left-wing Labor Party leh right-wing Social Encounter Party ṭangrual hmingin inthlan hi a chuh a ni.

Mexico President atana thlan thar Obrador hi ram hrang hrang hruaituten lawmpuina an hlan nghal a, lawmpuina hlantu zingah hian US President Donald Trump leh Canada Prime Minister Justic Trudeau te pawh an tel.