PPP chairman Zardari convoy bei

Pakistan People's Party (PPP) chairman Bilawal Bhutto Zardari-a convoy chu Pathianni khan Karachi-a misual ṭhenkhatten lunga tawngin an bei.

Bhutto hi inthlanpui an neih turah Karachi-a Lyari khuaa campaign ṭan turin a kal a ni. Bhutto hi him takin chhuak thei mah se, misualte han a car darthlalangte an vuak chhiat sak a ni. PPP worker-te chuan an party hruaitu beitute hi lungin an tawng let ve nghal nia sawi a ni.

Bhutto convoy beitute leh PPP worker-te intihbuai zui avang hian Bhutto Zardari hi pawh hi darkar chanve vel kalsawn thei loin a awm phah a ni. A thupuangtu Mustafa Nawaz Khokhar chuan an party chuan Sindh province-ah election campaign chu ruahman lawk anga an kalpui tur thu a sawi. Hei bakah hian party worker-te chu boruak muanawm siam turin a ngen a, tharum thawhna chu tharum hmanga chhang let lo turin a ngen.

Pakistan inthlanpui hi July 26 hian neih a ni dawn a, Bilawal Bhutto Zardari hi NA-246, Karachi bialah a ding dawn a ni.