US-in Kum khat chhungin North Korea nuclear program tihtawptir tum

US President Donald Trump-a national security adviser John Bolton chuan North Korea nuclear weapon leh ballistic missile programme chu kum khat chhunga tihtawp turin ruahmanna an siam tih a sawi.

John Bolton chuan an ruahmanna siam chungchang hi US Secretary of State Mike Pompeo pawhin NKorea hotute a sawipui thuai tur thu a sawi bawk. North Korea tan an ram hrekna hlih thuai a nih theihna tur leh, South Korea leh Japan aṭanga chhawmdawlna an dawn theihna tur hun ṭha tak a ni dawn tih a sawi bawk.

June 12-a Singapore-a US President leh North Korea hruaitu Kim Jong-un ten meeting an neih hnuah khan Trump chuan NKorea nuclear ralthuam chu an ram tana hlauhthawnawm a ni lo tih a sawi a, mahse heti chung hian NKorea-in a nuclear programme a tihtawp hma chuan an hrekna chu hman chhunzawm zel a la nih tur thu a sawi a ni.

Bolton chuan NKorea record pawh an hrechiang tih sawiin, an nuclear programme kum khat chhung tihtawp a nih theihna tur ruahmanna an siamte chu NKorea hian a thawhpui a nih chuan rang taka hmalak nghal theih a ni dawn tih a sawi. Kum khat chhung atana ruahmanna an siam hian North Korea chemical leh biological weapon, nuclear programme leh ballistic missile-te a huam vek dawn niin a sawi bawk.

Mike Pompeo hian April thla aṭang khan NKorea hotu Kim hi ṭum hnih a hmu tawh a, a hmuh hmasak zawk chu CIA director a nih lai a ni. Kar leh tawp lam hian Kim hi hmuh leh a tum a ni.