Thailand pûka naupang tângte ni 10 hnuah damin hmu

Thailand rama pûk chhunga tâng, football team leh an coach te chu ni 10 hnuah Thawhṭanni zan khan nungdamin hmuh an ni a, mahse tui a la len nasat avangin pûk aṭanga lachhuak tur hian thla tel an nghah a la ngai dawn nia sawi a ni.

Football team te hi mipa naupang, kum 11-16 inkar mi 12 niin a, an coach hi kum 25 mi a ni. June 25 khan football an practice zo, Thailand hmar lama Myanmar ramri bul ramhnuaia Tham Luang pûk an fan laiin chin hriat lohin an awm a, a hnuah tuilian vangin pûk chhungah hian an tangkhang tih hriat a ni ta a ni.

Chiang Rai biala awm, Tham Luang pûk hi fur laiin tuilianin nasa takin a chim ṭhin a, tuilian hi September/October thlaah te a kam chauh ṭhin a ni. Hei vang hian pûka tâng mipa naupang rualte leh an coach hi hruaichhuah mai theih an la ni dawn lo a, tuilian kâm hun nghah emaw, naupangte hi tuilian diving gear hman zirtir emaw a ngai dawn nia sawi a ni.

Thailand sipaite chuan naupangte hi thla eng emaw zat daih tur ei tur supply an ni dawn tih sawiin, hemi chhung hian pûk aṭanga hruaichhuah dan ngaihtuah chhunzawm zel a nih tur thu an sawi. Chhanchhuah hna thawktute chuan tui level tihhniam tum hian theihtawp chhuah mah se an la hlawhtling thei lo.

Chin hriat loha awmte hi hun rei tak zawn an nih hnuah Thawhṭanni zan rei tawh takah khan tuilut thiamte chuan pûk chhunga lung, km 4 vela sang, tuiin a chim phak lohah an hmu a ni. Naupang hmu hmasatute hi British diver pahnih, John Volanthen leh Rick Stanton te an ni, pûka tangkhangte chhanchhuah hna thawhna kawnga tawnhriat lo nei ṭha tawh takte an ni.