Australia-in Palestinian Authority ṭanpuina pek titawp

Australia sorkar chuan Palestinian Authority hnenah midang kal tlang loa ṭanpuina a pek ṭhin chu a titawp tih nimin khan a sawi.

Australia sorkar chuan Palestinian te hnena ṭanpuina an pek ṭhin hi politics kaihhnawih tharum thawhna thlenga thiam loh chantir, Palestinian mite ṭanpuina atan hman a ni thei tih a sawi. May thla khan Foreign Minister Julie Bishop-i chuan an sum pekte hi pawikhawihna thlen ṭhinte kutah pek a ni ngai dawn lo tih tiam turin Palestinian Authority hnenah ziakin a lo ngen tawh a ni. Hemi hnu hian World Bank hnuaia Multi-Donor Trust Fund for the Palestinian Recovery and Development Program tana sum an pek ṭhin chu a titawp ta a ni.

Bishop-i chuan World Bank kaltlanga PA tana sum an pek tawh chu a hmanna tur dik taka hman a nih ngei a rin thu a sawi. Hemi rual hian an sum pekte hian Australia-in a duh loh thil tihna lama hman theihna hun remchang a siamsak thei a ni tih a sawi bawk.

Australia-in trust fund tana dollar maktaduai 7.4 a pek ṭhin hi United Nations hnuaia Humanitarian Fund for the Palestinian Territories hnenah pek a ni tawh dawn thung a, hei hi health care, food, water bakah sanitation leh shelter pekna atante hman ani dawn a ni.