Syria tualchhung buaina vangin mi 270,000 tlanchhia

United Nations chuan kar hnih kal taa Syria sipaiten an ram chhim thlanglam, helho awmna biala beihpui an thlak avangin mi 270,000 in an in leh lo an tlanchhiatsan tawh niin a sawi.

Deraa leh Quneitra province-a sipai leh helte inbeihna avanga civil mi tlanchihate hian Jordan ramri leh Israel-in a luahsak mek, Golan Heights lam an pan a ni. Mahse heng ram pahnihte hian raltlante luh an remtih tur thu an la sawi lo.

Syria sipaiten beihpui an thlak hi Russia sipaite chuan thlawhtheihna hmangin an lo pui bawk.

Sipaiten beihpui an thlak hnu hian helho thunun khua 10 chuang zet chuan sorkar kuta inpek a, President Bashar al-Assad-a rorelna hnuaia awm an remti tawh a ni.

Syrian Observatory for Human Rights chuan Deraa leh Quneitra province-a beihpui thlak vang hian civil mi 130 chuang a thi tawh niin a tarlang.

Tualchhung indona thleng vanga tlanchhia mi 270,000 zinga 70,000 vel chu Jordan ramri bul, Nassib-ah an awm a, mahse ramri hi khar a nih avangin an tangkhang mek a ni, ei tur mumal pawh nei loin an awm nia sawi a ni bawk.

Jordan chuan raltlan 660,000 zet an lakluh tawh avangin midang an lakluh belh thei tawh rih lo nia sawiin a ramri hi a khar a, Israel chuan Syrian mite chu a ram china an luh a remti dawn lo tih a sawi bawk a ni.