North Korea-ah Pompeo a zin dawn

US Secretary of State Mike Pompeo chu Ningani hian North Korea ramah a zin dawn a, Korean Peninsula aṭanga nuclear ralthuam tihbo dan tur chungchang chu NKorea hotu Kim Jong-un a sawipui ang.

June thlaa US President Donald Trump leh NKorea hotu Kim Jong-un ten Singapore-a meeting an neih hnua Pompeo-an NKorea ram a tlawh hmasakna ber tur a ni.

President Trump chuan Singapore-a meeting an neihnaah hian nuclear ralthuam chungchanga hun rei tak ram pahnihte inkara inrem lohna awmte chinfelna tur an ziak niin a sawi a, he inremna an lo siam tawh hi a taka kalpui turin Pompeo hian hma a la chhunzawm dawn a ni.

White House thupuangtu Sarah Sanders-i chuan US chuan NKorea nena an inbiakna tihlawhtling turin hma an sawn zel tih a sawi a, tunhnaia NKorea-in a nuclear weapon programme tihtawp vek a tum lo nia media lama an report chungchang chu a sawichiang duh lo.

State Department chuan Pompeo hian Ningani hian NKorea panin, an ram hruaitute a kawm dawn a, Inrinni-ah Tokyo a pan leh dawn niin a sawi. Tokyo-ah hian Japan leh South Korea official-te a hmu leh ang.