Indonesia-a lirnghingah mi 10 an thi

Indonesia-a Lombok thliarkarah nimin zing dar 7 khan magnitude 6.4-a nain lir a nghing a, mi 10 an thi. Lirnghinna hmun, Lombok thliarkar hi khualzinin an tlawh nasat hmun niin, Bali khawchak lam km 40 vela hlaa awm a ni. Lirnghing hian in eng emaw zat a sawi chim a, hliam tuar pawh mi tam tak an awm niin official-te chuan an sawi.

US Geological Survey chuan lirnghing inṭanna hi Lombok hmarlam, Mataram khua aṭanga km 50 vela hlaah niin an sawi. Magnitude 6.4-a naa nghing hnuah hian na vak loinṭum 60 chuang a nghing nawn niin an sawi bawk.

Indonesia disaster agency thupuangtu, Sutopo Purwo Nugroho chuan mi 40 chuangin hliam tuarin chenna in eng emaw zat a chhia a tih a sawi a, report hi kimchanga an lak dawn loh vangin lirnghingin thil a tihchhiat pawh hi a punchhoh a rin thu a sawi. Lirnghing tuarte chhanchhuah leh hruaichhuah hna chu thawh nghal a nih thu a sawi bawk.

Lirnghing hian leimin a thlen avangin tlang lawn miten an pan lar tak, Rinjani National Park tlang pawh khar a ni. Lirnghing vang hian tlang lawna kal mi  ṭhenkhat an tangkang a, an zinga mi Khairul Azi chuan kawng tam tak leiminin a hnawh avangin an chhuahsan mai thei lo tih a sawi a, midangte pawh biakpawh an tum mek tih a sawi. Indonesia hi Ring of Fire-a awm a nih avangin lirnghing leh tlangkang a thleng fo a ni. Kum 2016 khan Sumtara thliarkar hmarchhak lamah magnitude 6.5-a nain lir a ngihng a, mi tam tak an thih bakah mi 40,000 chuang chu thiar chhuah an ngai a ni.