Malaysia PM hlui eiruk thubuai siamsak

Malaysia Prime Minister hlui Najib Razak chu state development fund 1MDB sum tam tam tak tichingpena puhin thubuai siamsak a ni a, hei bakah hian president a nih laia dik lo taka thuneihna hmanga puhna leh thubuai dang pakhat siamsak a ni bawk.

Thawhlehni zan khan anti-corruption hotuten an man a, zanah an hreng zui bawk. Mahse nimin zing khan Najib hi bail-a chhuah tir leh nghal a ni.

PM hlui Najib hi 1MBD fund aṭangin a mimal tan dollar maktaduai 700 pawt pengah puh a ni. Mahse an puhna hi thu dik lo niin a sawi thung.

Najib-a hi a thubuaiah hian thiam loh chantir a nih chuan kum 20 thleng lung-in tantir theih a ni ang.

1MDB hi Najib-an prime minister a nih lai, kum 2009-a a din a ni. Hemi hmang hian an state khawpui Kuala Lumpur chu financial hub a din a, investment kaltlanga an ram economy siamṭhat tum a ni. Mahse kum 2015 kumtir aṭang khan bank leh bankholder-te hnena a sum bat dollar tluklehdingawn 11 zet a pekchhuak ṭhat loh avangin a hmingchhe ṭan a ni. Hemi hnu hian Wal Street Journal (WSJ) chuan 1MBD fund aṭang hian dollar maktaduaui 700 zet chu Najib-a personal bank account-a chhunlut a nih thu a rawn tarlang a, fund ami dollar tluklehdingawn tel chu chhui zui theih lohin an la awm bawk.

Najib hian eirua puhna hi a pha a, a laka thubuai siam pawh Malaysia thuneitute chuan an titawp a, mahse ram dang eng emaw zatin an chhui zui tho a ni.

Development fund eirua puh a nihna hi May thlaa President thlanna neiha Najib-an kum 93 mi Mahathir Mohamad a hneh lohna chhan pakhat a ni. President atana lakluh a nih hnuah lawkah Mahathir chuan Najib-a eirua puhna thubuai hi hawn ṭhat leh a tiam, Najib hi Malaysia a chhuahsan khapsak zui nghal a ni bawk.

June thla khan police-te chuan Najib-a in hi an lo dap sak tawh bawk a, pawisa leh thil hlu dang dollar maktaduai 273 hu zet an man a ni. An thil man zingah hian lunghlu leh rangkachak ṭhi dollar maktaduai 1.6 man vel pawh a tel a, mahse Najib chuan tlereuh leh thil hlu man to tak tak a neihte chu dan ang taka a lei leh, midangten an pek te niin a sawi thung.