Israel-in Palestinian fund tur hreksak dawn

Israel sipaiten Israel beih tum Palestinian mi an man jail-a tang mekte leh an inbeihnaa an tihhlum tak chhungte hnena Palestinian Authority-in sum a pek ṭhin hreksakna tur chu Israel parliament-in a pass.

Parliament-a law an pass hmang hian Israel-in PA tana thla tina chhiah a lakkhawm ṭhin, dollar maktaduai 130 zinga eng emaw zat chu hreksak a ni dawn a ni.

Inremna an lo siam tawh angin, kum 1990 chho aṭang khan Israel chuan PA pual hian an ram kaltlanga bungrua lakluhte aṭangin chhiah hi a la ṭhin a ni. Heng chhiah an lak aṭanga 7% vel, dollar maktaduai 330 vel chu kumtinin Israel an beihnaa thi Palestinian thi chhungte leh jail-a tang mek chhungte hnenah sem ṭhin an ni. Hei hi Israel chuan duh loin, hetianga PA-in sum a pek ṭhin hi firfiaka chetna a thlawpzia a lantirna niin a sawi a, mahse PA chuan jail tangte leh martar chhungte chhawmdawlna tur a ni, a ti thung.

Israel parliament-in Thawhṭanni zan dan a pass thar hi thlawptu 87 an awm laiin, a duh lo lamah vote 15 atla thung. Defence ministry chuan Israel beitu chhungte hnenah ṭanpuina sumte hi pek a ni tawh lo tih a pawm hunah heng fund an hreksak hi PA hnenah hian pek leh a ni ang.

Hetih lai hian PA Minister of Prisoner Affairs Issa Qaraqeh chuan fund hi pe chhunzawm turin Israel chu a phut a, Israel nena Oslo Agreement an ziah lai hian Israel chuan heng chhungkuate hnenah hian sum an pe ṭhin tih pawh chiang taka hriattir a ni a, hetihlai hian engmah dodalna a nei lo a ni, a ti.

Kumin March thla khan US Congress chuan PA-in Palestinian mi jail tangte leh an chhungte ṭanpuina sum a pek ṭhin a tihtawp hma chuan US-in sum hmanga a puihna ṭhenkhat tihtawpna tur, Taylor Force act a lo pawm tawh bawk. He Act hi kum 2016-a Palestinian miten Israel an beih ṭuma America mi an tihhlum hming chawia phuah a ni.