Ecuador president hlui manna tur thupek tichhuak

Ecuador court chuan an ram president hlui, Rafael Correa chu kum 2012-a a khingpui rukbonaa inhnamhnawiha puhin Thawhlehni khan manna tur thupek a tichhuak.

Correa hi a nupuite ram, Belgium-ah a awm mek a, an puhna hi thu dik lo niin a sawi.

Judge Daniella Camacho chuan kum 55 mi, Correa hi an rama thawn kir a nih theihna turin Interpol lam pawh a hriattir tawh niin a sawi.

Lawmaker hlui Fernando Balda chu Correa nena an inkar boruak ṭha lo avangin kum 2012 khan Bogota, Colombia-ah a tlanchhia a, a tlanchhiatna ramah hian rei vak lo rukbo a ni zui a ni. Balda chuan rukbo a nihna tura ruahmantu ber chu hetihlaia an ram president, Correa hi niin a puh a ni. Hetih lai hian Balda hi Correa-a kaihhruai sorkar paihthlak tumah puh a ni a, a hnuah an ram himna tiderthawnga puhin kum khat lung-in tang turin hrem a ni.

Kum 2007-2017 chhunga Ecuador president term thum lo chelh tawh, Correa chuan an puhna hi thu dik lo niin a sawi a, hetianga an puhna hi president ṭanglai leh a deputy hlui Lenin Moreno-an a hming tihchhiat a tumna mai niin a sawi.