UN-in ramri hawng turin Jordan ngen

United Nations human rights office and refugee agency UNHCR chuan Jordan ram hnenah Syria tualchhung indona vanga tlanchhia, Jordan ramri bula tangkhang mekte tan a ramri hawnsak turin a ngen.

Syria chhimthlang lam, Deraa biala sorkar sipai leh helho inbeihna avangin civil mi tam tak an tlanchhia a, UN chuan kar hnih chhunga tlanchhia hi mi 270,000 vel an tling niin a sawi. Tlanchhia zinga tam tak chu Jordan ramri bul leh, Israel-in Syria ram a luah, Golan Heigh ramri bulah an awm a, mahse heng ram pahnihte hian ramri hi an khar avangin an tangkhang mek a ni.

UN human rights thupuangtu Liz Throssel chuan Jordan sorkar chu raltlante an luh theihna tura a ramri khar hawng turin a ngen a, ram dangte pawh civil mi tlanchhiate lo dawngsawng tura inhawng turin a ngen bawk. Mahse Jordan hian Syria mi raltlan tam tham tak a lakluh tawh avangin a dang a lakluh belh thei tawh rih lo niin a sawi thung. Syria mi raltlan 650,000 zet chu Jordan ramah hian an awm tawh a, tuna ramria tangkhang mekte hi 40,000 vel nia sawi a ni bawk.