Israel sipai bengtu Palestinian tleirawl chhuah zalen

Israel chuan West Bank-a Israel sipai pakhat kut thlaktu, Palestinian tleirawl Ahed Tamimi chu thla riat jail a tan hnuah Inrinni khan a chhuah ta.

Ahed Tamimi-in Nabi Saleh, West Bank-a an in bula Israel sipai pahnih a ankhum lai leh, sipai pakhat a pet leh a beng lai video hi nikum lam khan a darh nasa hle. Palestinian thenkhatte chuan Israel-in an ram a luahsak dodalna lantirtu angah an ngai a, mahse Israel mi tam zawk chuan mi hriat hlawh a nih theihna tura buaina siam lui angah an ngai thung.

He thil thlen lai hian Tamimi-i hi kum 16 a ni a, thubuai hrang hrang 12 zet siamsak a ni. A thubuai zingah hian kutthlaka puhna, sipaite tibuai leh lunga tawnga puhnate te a tel. Thubuai ngaihtuahnaah Tamimi chuan Israel sipaite a ankhum leh kut a thlakna chhan chu sipaite hian rubber bullet-a a laichin pakhat, kum 15 mi Mohammed an kap lai a hmuh vang niin a sawi. Israel sipaite chuan tharum thawhna thleng vangin boruak tidai turin Tamimi-te in bulah hian sipaite hi an tir niin an sawi a, hei bakah Mohammed hian thla hmasa khan a lu-a hliam a tawrh chu sipaite kahna ni loin a tlukna vang a ni tih a sawi bawk.