Israel-in Omicron variant vangin ram dang aṭanga khualzin luh a khap
Israel chuan Covid-19 hri chi thar hlauhawm tak, Omicron leng vangin khuahkhirhna siamin, an ramah ram dang aṭanga khualzin luh a khap. Omicron variant vanga khawvel ram zinga an ramri khar hmasa ber ram an ni.
Kar liamta Inrinnia thuchhuah an siamah, Prime Minister Naftali Bennett chuan inkhuahkhirhna siam thar hian ni 14 a awh phawt dawn tih a sawi.
Official-te chuan khuahkhirhna siam chhung hian South Africa rama an hmuhchhuah, World Health Organization-in “variant of concern”-a an puan Omicron lakah Covid vaccine hna thawh dan zirchiang leh hriatchian theih a ni ang, an ti.
He khapna thupek hi nizan zanlai aṭanga kenkawh ṭan a ni. African ram aṭanga khualzin luh khapna dan erawh kar liamta Zirtawpni khan puan a lo ni tawh thung.
Khapna siam thar hnuaiah hian Israel ram mipui vaccine dose kima la tawh te pawh an rama hawte an inkhunghran a ngai dawn a ni. Vaccine dose kima la chu ni thum an inkhung a ngai dawn a, vaccine lote chu ni sarih an inkhung thung ang. Africa ram aṭanga hawte chu sorkar quarantine hotel-a negative result an neih hma an awm tur tih a ni bawk.
Covid variant hmuhchhuah thar hi Belgium, Botswana, Hong Kong, Italy, Germany leh United Kingdom-ahte a kai hmuh an ni tawh. Israel-ah pawh Omicron kai pakhat awmin, rinhlelh mi pasarih an awm awm mek. Ram hrang hrangte pawhin khuahkhirhna siam dan an ngaihtuah mek a, hetih lai hian epidemiologist-te erawh chuan khawvel huapa Omicron darh veng tur chuan a tlai tawh niin an sawi thung.
England-ah face mask vuahna thupek tichhuak
England sorkar pawhin Omicron variant darh zel tur venna atan naktuk aṭanga hman ṭan turin, dawr leh public transport-ah face mask vuah vek turin thupek a tichhuak thar bawk.
Prime minister Boris Johnson chuan ram dang aṭanga khualzin lutte chuan PCR test an tih vek a ngaih thu a lo sawi tawh a, Covid variant thar kai contact zawng zawng chu mahnia inkhunghrang zel turin a ti bawk. Hei bakah hian red list-a a dah ramte aṭanga lut chu ni 10 chhung khung hran an ni ang. UK-ah Omicron variant kai hi mi pahnih hmuh chhuah an awm tawh a ni.
Antony Blinken-a'n SAfrica a fak
US secretary of state Antony Blinken chuan South Africa-in an rama Covid variant hmuh chhuah thar chungchanga information a pe chhuak thuai chu lawmawm a tih thu a sawi. Hetianga langtlang taka thil kalpui hi ram dangte tan pawh entawn tlak a ni a ti. Africa ram mipui tam zawkte vaccine pek an nih theihna tura an thawhpui dan tur pawh South Africa hotute a sawipui thu a tarlang bawk.