Covid-19 vangin Africa ram 48-ten ramri khar
Africa ram hrang hranga Covid-19 kai hmuh tawh chu kar liam ta Inrinni khan mi 2,25,105 an awm tawh a, hri kai an pun zel avangin Africa ram 43-te chuan ramri khar a nih thu an puang.
Africa Centers for Disease Control and Prevention (Africa CDC) tarlan dan chuan Africa ram hrang hrangah Covid-19 vanga thi hi mi 6,040 an tling tawh a, hri kai mi 1,02,846-te chu enkawl dam an ni tawh bawk a ni.
South Africa, Egypt, Morocco, Djibouti, Nigeria leh Algeria ramte chu Africa ram zinga hri darh nasat berna ram a ni tih African Union (AU) Commission chuan a tarlang. Africa CDC hian Africa hmarchhak lama awm ramte chu Africa ram zinga hri hluarna ram a nih thu a tarlang bawk.
Kar liam ta Inrinni khan darkar 24 chhungin Egypt-a hri kai thar chu mi 1,677 an awm a, anni nen hian hri kai hi mi 42,980 an awm tawh tih Egyptian health ministry chuan a tarlang. Egypt hi Africa ram zinga he hri vanga thi tamna ber ram a ni mek a, kar liam ta Inrinni kha he hri vanga thi tam ber ni tlengin, mi 62 an thi a ni. An ni nen hian thi mi 1,484 an awm tawh a ni.
Africa ram zinga hri kai tamna ber chu South Africa a ni mek a, he ramah hian hri kai mi 65,736 an tling tawh a ni. Inrinni vek khan Ethiopia-ah hri kai thar mi 268 an awm a, anni nen hian hri kai hi mi 3,166 an awm tawh tih Ethiopian Ministry of Health chuan a tarlang.
Africa khawmualah hian ram 54 a awm a, heng zinga ram 43 chuan ramri an khar tih Africa CDC chuan a tarlang. Zan lama curfew puang ram 35 an awm bawk. Ram 7 chuan ram pawn aṭanga thlawhtheihna lut tur an khap zui a, ram 38 chuan zirna in hrang hrang an khar a, damdawi-in leh jail tlawh theih zat pawh ram 20 chuan an siam nghal a, ram 41 chuan hmaituamna hmang vek turin mipuite an hriattir bawk.
Khawvel pumah
hri kai mtd 7.8 awm
Worldometer in a tarlan danin khawvel puma Covid-19 kai hmuh tawh hi nimin thleng khan mi 78,92,315 an tling tawh. Hri kai zinga 40,53,157 chu enkawl dam an ni tawh a, hetihlai hian mi 4,32,762 in an thihpui tawh thung.
US chu hri kai tamna ber leh thihpui tamna ber ram a la ni chhunzawm zel a. US dawtah Brazil, Russia, India, UK, Spain, Italy, Peru, Germany leh Italy chu hri kai tam zualna ram an ni bawk.