Cambodia inthlanpui nei

Cambodia ram inthlanpui chu nimin khan neih a ni a, kum 30 zet thuneihna chang tawh Prime Minister Hun Sen-a kaihhruai party, Cambodian People's Party (CPP) chuan hnehna a chan leh ngei rin a ni.

Inthlana chuh thei lo turin nikum khan Supreme Court chuan eptu party lian ber, Cambodia National Rescue Party (CNRP) chu a ṭhiat a, hei bakah hian eptu pawl eng emaw zatin inthlan an boycott bawk. Hei vang hian CPP hian el pha tur tur a nei dawn lo nia sawi a ni. Hetihlai hian sorkar lam chuan inthlan hi political party 19 in an chuh niin a sawi a, mahse an zingah hian party chak leh lian an awm lo a, PM leh sorkar lai dodaltu lian pawh an tel lo nia sawi a ni.

Supreme Court-in CNRP a ṭhiah hnu hian party hruaitu eng emaw zat chu ram dangah an tlanchhia a, an party hotu Kem Sokha chu nikum September thla khan ram phatsantua puhin man a lo ni tawh bawk.

Inthlan neih hma ni hnih kaltaah khan thuneitute chuan independent media website eng emaw zat an kharsak nghal a ni. National Election Committee chuan inthlan result hmasa hi nizan khan a puan hman beisei a ni a, official result erawh chu August thla laihawla puan a ni ang.