China-ah hri kai thar mi 57 awm
China ramah nimin khan Covid-19 kai hmuh chhuah thar mi 57 an awm a, hei hi April 13 hnua ni khata hri kai hmuh chhuah tam ber ṭum a ni.
National Health Commission chuan hri kai hmuh chhuah thar zinga mi 36 chu Beijing khawpuia mi, ram pawna zinna nei lo, ram chhung aṭanga kai an ni tih a sawi.
Hei vang hian ram chhungah hri leng thawh hnihna a thlen hlauhthawnna a lian nghal hle.
Beijing-a hri kai hmuh tharte hi khawpui chhim lama sa zawrhna bazar nena inkaihhnawihna nei nia sawi an ni a, hei vang hian he bazar chhehvela residential estate 11-ah chuan lockdown puan leh nghal a ni.
Thuneitute chuan khawpui chhunga sa tharlam leh frozen meat zawrhna, ar leh sangha zawrhna bakah warehouse leh catering service-te chu a him tawk em tih enfiah turin thupek an tichhuak nghal a ni.