Nepal map thar lower house-in pawm

Nepal map thar chu kar liam ta Inrinni khan Parliament-a lower house, House of Representative-ah darkar li zet sawi a nih hnuah pawm a ni.

He map tharah hian Nepal leh India ramri, ram pahnihte inchuh lai mek Lipulekh, Kalapani leh Limpiyadura chu Nepal ram chinah rinluh a ni. House of Representative speaker Agni Prasad Sapkota chuan member 275 zinga member 258 ten map thar duh lamah vote an thlak thu leh duhlo lama vote an awm loh avangin lungrual taka an pawm thu a sawi. 

Nepal Parliament-a upper house, National Assem­bly-ah pass a ngai leh dawn a, chumi zawhah President Bidhya Devi Bhandari pawmpuina lak leh a ngai ang. Hemi hnu hian constitution zingah chhiar tel theih a ni tawh ang.  

May 31 khan Parlia­ment-a House of Repre­sen­tative-ah Nepal law minister Shiva Maya Tumba­hamphe chuan Nepal map thar hi a lo pharh tawh a ni. 

A tirah pawh he thil hi India chuan a duh loh thu a sawi nghal a, hemi chungchangah hian India chuan Nepal hian a ramri china heng ram bung pathumte hi rinluh theihna turin finfiahna a neih loh thu a tarlang.