Thailand puka tangte a tahtawla lakchhuah ngai maithei
Thailand-a football team, mipa rawlthar 12 leh an coach, kum 25 mite chu ni 10 chhung chin hriat loha an awm hnuah Chinag Rai province-a Tham Luang Nang Non pukah nungdama an awm hmuh a ni a, mahse tui a len nasat avangin puk aṭang hian lakchhuah theih an la ni lo.
Official-te chuan puka tangte hruaichhuah dan hi ngaihtuah mek a ni tih a sawi a, mahse puk hi tuilianin a la chim reng avangin a la harsa dawn hle tih an sawi. Hemi rual hian puka tangte hi an hriselna dinhmun azirin a rual ni loin, a tahtawla lakchhuah an ngai maithei nia sawi a ni.
Chiang Rai provincial Governor Narongsak Osatanakorn chuan puka tang mek mi 13 te hi a ruala lakchhuah theih an ni lo maithei tiin, boruakin a zir a, anmahni an inpeih a nih chuan lakchhuah theih a ni dawn ti a sawi a, hemi rual hian thuneitute chuan nitin an dinhmun hi an enfiah reng dawn a, an nunna atana hlauhthawnawm tur chuan eng thil mah tih an tum lo tih a sawi bawk.
Puka tangte hi rawlthar kum 11-16 inkar mi 12 leh an caoch te an ni a, June 23-a an football practice zo Tham Luang pukah an lut chu chin hriat lohin an awm zui a, hun rei tak zawn an nih hnuah Thawhṭanni zan tlai tawh takah khan tuilut thiamten puk chhunga nungdama an awm hi an hmu a ni. Football team te hi puk chhunga an awm laiin ruahsur nasain puk chhunga tui a tihlen vangin chhuak thei loin an tang zui a ni.
Puk chhunga an awm hmuh an nih hnu hian an hriselna dinhmunte pawh a ṭha nia sawi a ni a, tui hian a la chim san avangin puk aṭanga chhuak tur chuan tuichhung luh te an thiam a ngai a, mahse an zingah tumahin tui chen leh luh an thiam loh avangin hruai chhuah theih an la ni lo. Tui kam hun nghak tur chuan thla hnih thla thum vel la nghah a ngai dawn nia sawi a ni. Puka tui tlingte hi paih chhuah hna thawh ni mah se a kam thei lo a ni. Hetih lai hian naupangte hian diving mask leh thawk lak dan te an zir mek a ni.
Thuneitute chuan puka tangte ei tur leh damdawite thawnluh anih thu sawiin, Thai Navy SEALS member pasarihten an awmpui thu an sawi.