Syria beihnaah IS hotu al-Baghadadi-a fapa a thi

Islamic State (IS) firfiak pawl chuan an pawl hotu lu ber Abu Bakr al-Baghdadi-a fapa chu Syria-a Homs khua beihnaah a thi niin Thawhlehni khan a tarlang.

Al-Baghdadi-a fapa chungchang hi IS news channel-ah an tarlang a ni. Hetih lai hian Baghadadi awmna chin hi hriat a ni lo a, a thi nia report a awm fo a, mahse IS thuchhuah aṭang hian ala dam ngei nia rin a ni. Baghdadi-a thuchah tihchhuah hnuhnung ber chu nikum September thla kha niin, audio record minute 46-a rei a tichhuak a ni. 

He a thuchah tihchhuahah hian khawvel ram hrang hranga an mi leh sate chu khawthlang ramte bei turin a fuih a, hei bakah hian Iraq, Syria leh hmundangah pawh pawikhawihna thlen chhunzawm zel turin a chah bawk.