California ram kang la ziaawm lo

US-a California hmar lama ram kang chuan ziaawm lam a la pan thei lo. Ram kang vang hian mi panga an thi tawh a, kar kalta Ningani khan kangṭhelhtu pahnih an thih belh leh a ni.

Kangṭhelhtute chuan ram kang hi ṭhelh tumin theihtawp chhuah mah se, 5% vel chauh an la ṭhelhmit thei a ni. Mi 17 chu chin hriat lohin an awm mek a, mi sang telin an chenna in an tlanchhiatsan tawh bawk.

California hmarlama ram kang, Carr Fire vang hian in 500 vel a chhe tawh a, in dang tam tak pawh luah ngam lohin a awm mek a ni. He kangmei hi kar kalta Thawhṭanni-a chhuak kha a ni a, ram acre 48,000 chuanga zau a kang tawh a, hei hi San Francisco khawpui ai pawhin a zau zawk a ni.

California Department of Forestry and Fire Protection thupuangtu, Scott McLean chuan ram kang hian khaw chhung a hnaih tawh hle tih a sawi a, hei vang hian kangṭhelh pawl leh police-te pawh mahni insaseng thei lo an awm hlauhthawn vangin in tin an luhchhuak mek niin a sawi. Ram kang ṭhelh hna hi kangṭhelhtu 3,400 chuangin an thawk mek a ni. Khua a ro vang leh, thli a tleh tel vangin kangmei chhuak hi a chak hle a ni.