Nuclear deal aṭanga US inhnuhdawh tumahin hlawkpui lo - Rouhani

Iran President Hassan Rouhani chuan Iran leh world power ram parukten nuclear deal an siam aṭanga US a inhnuhdawh chu eng ram mahin an hlawkpui dawn lo tih a sawi.

Austria ram tlawha zin, Iran President hian Vienna-a press conference a neihah he thu hi sawiin, nuclear deal aṭanga a inhnuhdawh vang hian US hian a hlawkpui dawn lo a, ram dangte pawhin an hlawkpui dawn bawk lo niin a sawi. He inremna siam hi Iran chuan vawn zui zel a duh a, inremna ziaktu US ni lo ram dangte chu thawhpui zel a tum tih a sawi bawk.

Kum 2015 khan Iran chuan world power ram paruk US, Britain, France, Russia, China leh Germany-te chu nuclear deal l (Joint Comprehensive Plan of Action) a lo ziahpui tawh a, he inremna an siamah hian Iran chu a nuclear weapon programme titawp tura tih a ni a, hemi chhan letna atan hain khawthlang ramten Iran an hrekna chu an hlip dawn thung a ni.

Mahse May 8 khan US President Donald Trump chuan he inremna siam aṭang hian US a inhnuhdawh thu a puang a, Iran hrekna pawh siam thar a ni dawn tih a puang nghal bawk. Trump chuan nuclear deal an siam hi inremna chhe tak a ni tih sawiin, he inremna hian Iran-in nuclear ralthuam a siam ṭhin leh, firfiakte a thlawpna ṭhin pawh a veng zo lo niin a sawi. Inremna aṭanga US a inhnukdawk hi ram hrang hrangte chuan an sawisel nasa hle a, inremna siampuitu ram dangte erawh chuan nuclear deal an lo siam tawh hi vawnnun zel a nih theihnan theihtawp an chhuah a ni.