UN-in indona titawp tura hma la turin South Sudan hruaitute ngen

South Sudan ram tlawha zin, UN Deputy Secretary-General Amina Mohammed chuan nimin khan South Sudan hruaitute chu an rama tualchhung indona thleng tihtawp a, remna a awm theihna tura hma la turin a ngen.

Mohammed chuan remna leh muanna a awm theihna atana inbiakna nei chhunzawm zel turin South Sudan hruaitute chu a ngen a, inbiakna chauh chu buaina chinfel theihna kawng awmchhun niin a sawi.

Kar hmasa khan South Sudan President Salva Kirr leh helpawl hruaitu Riek Marchar te chuan an ram khawpui Khartoum-ah an inkara inhuatnaa awmte tihtawp a, kum li zet an inbeihna te tihtawp an lo tiam tawh a ni. Mahse inremna an siam hi a hnu darkar reiloteah palzutin, an inbei zui leh nghal a, he thilah hian a ti dik lotuah an inpuh tawn a ni.

South Sudan tualchhung indona hi kum 2013 kumtawp lam aṭang khan a thleng a, tualchhung indona thleng vangin ramchhung leh rampawnah mi maktaduai li vel zet an tlanchhe tawh niin UN chuan a tarlang. Kum 2015 August thla khan UN nawrna avangin inremna an lo ziak tawh a, ṭangrual sorkar din an remti a, mahse kum 2016 aṭang khan an inbei chhunzawm leh tho a ni.