Thailand puka tangte ṭanpuitu diver a thi

Thailand-a Tham Luang puka tang mek, football team-a rawlthar 12 leh an coach te chhanchhuak tura kal, diver pakhat chu oxygen a tlakchham avangin a thi.

Chiang Rai Governor Narongsak Osotthanakorn chuan, petty officer Saman Gunan chu Tham Luang puk-a tangte tana oxygen tank pe turin a kal a, a kir leh lamah amah zawk hi oxygen a tlakchham avangin a chau ta a niin a sawi. Diver dangin hruai chhuak mah se a harhchhuak zo ta lo a ni.

PO Saman Gunan hi kum 38 mi a ni a, navy hi chhuahsan tawh mah se puk-a tangte ṭanpui leh chhanchhuah hna thawhna kawngah hian a pui. Official-te chuan midang ṭanpuina avanga a nunna chan ta, Gunan vuina hi Thailand Lal-in a buatsaih dawn niin an sawi.

Thailand Navy Seal commander Rear Adm Arpakorn Yookangkaew chuan PO Gunan hian puka tangte hman tur oxygen bur a pe zo, a kir lam chu a chau a, nikhaw hre loin a awm zui a, damdawi-inah hruai a nih hnuah a chatthla ta niin a sawi. Diver thiam leh tawnhriat nei ngah tawh, PO Gunan-a chunga thil thleng hian puka tang mekte hruaichhuah a hautak tur zia pawh a tilang chiang hle a ni, a tibawk.

Rear Adm Yookongkaew chuan officer Gunan-a chunga thil thleng chu pawi a ti takzet tih a sawi a, hemi rual hian hei vang hian an chiai phah dawn lo a, chhanchhuah hna thawhna kawngah theihtawp an chhuah zel tur thu a sawi. PO Gunan-a inpekna chu a thlawna liam tir mai an tum lo tih a sawi bawk.

Puk-a tangte chhanchhuah leh ṭanpui hna hi mi 1,000 vel zetin an thawk mek a, an zingah hian navy diver, sipai leh civil mi volunteer-te an tel.

Puk chhunga oxygen level hi a tlahniam nia sawi a ni a, hei vang hian thuneitute chuan puk chhunga oxygen supply na tur, cable km 5-a thui dah luh tumin an bei mek a ni. Naupangte leh an coach hi tun dinhmunah chuan an hriselna pawh a ṭha tawk nia sawi a ni a, ei tur leh damdawite pek luh an ni tawh.

Thuneitute chuan puk-a tangte hi him taka lakchhuah an nih theih dan tur an ngaihtuah mek a, an nunna atana hlauhthawnawm zawng chuan eng thil mah tih an tum lo tih an sawi. Hetihlai hian puk chhunga tuilian vangin hruaichhuah theih an la ni lo a, tui hi paihchhuah hna thawh reng ni mah se a la kam thei meuh lo a ni. Tui hi a kiam theih loh chuan naupangte hian tui hleuh leh tui chhung luhte an zir a ngai dawn a, an zingah hian tui hleuh thiam an awm lo a ni. Tui hleuh an thiam loh chuan fur zawh hun an nghah a ngai dawn a, September thla thleng an nghah a ngai mai thei nia sawi a ni. Hetih lai hian ruahtui a tlak chhunzawm zel chuan tuna an tawmhulna hmun pawh hi tuilian hi a chim pha thei mai thei nia sawi a ni bawk.