Pakistan High Court-in PM hlui inthlan chuh a phalsak

Pakistan-a Lahore High Court chuan an ram prime minister hlui Shahid Khaqan Abbasi chu an ram inthlanpui neih turah Rawalpindi bial aṭanga a chuh a phalsak.

July 25-a Pakistan inthlanpui neih turah PM hlui Abbasi hian Rawalpindi bial aṭanga chuh a tum a, mahse Punjab Election Appellate Tribunal chuan a nomination paper thehluhah a thil neih zat te a tarlang kim lo nia sawiin a nomination hi a hnawlsak a ni. Abbasi chuan tribunal thutlukna hi Lahore High Court-ah a khing zui a ni.

Nimin khan Lahore High Court-a Jutice Mazahir Ali Akbar Naqvi kaihhruai bench chuan Abbasi ngenna thehluh chu ngaihtuahin, tribunal thutlukna lo siam tawh chu a hnawlsak a ni.

Abbasi hian inthlanpui neih turah hian Islamabad leh Rawalpindi bial aṭanga chuh a tum a, Islamabad bial aṭanga chuh a tumna chu pawmsak a ni. July 25-a inthlanpui neih turah national leh provincial assembly member 849 tur thlan a ni dawn a, inthlan neih tur atan hian candidate 11,855 an awm tawh a ni.