Japan-in Tokyo beitute tihlum

Japan chuan kum 1995-a chemical hlauhawm tak hmanga Tokyo underground beitu, Aum Shinrikyo pawl member pasarihte chu nimin khan a tihlum. An zingah hian an pawl hotu lu ber Shoko Asahara pawh a tel.

Aum Shinrikyo member-te hian kum 1995, March 20 khan Japan khawpui, Tokyo-a subway-ah liquid nerve agent, Sarin awmna bag chu hnutchhiah a ni. Bag-a Sarin gas an dah put hian minute reiloteah subway-a awmte tan hian harsatna thlenin, thawk lama harsatna an neih bakah an luak a, ṭhenkhat chuan khua an hmuh theih loh bakah che thei loin an bawk. Gas hlauhawm tak tihchhuah vang hian mi 13 an thi a ni.

Shoko Asahara leh a pawlte hian kum 1994-a Sarin gs hmanga mi beiah puh an ni bawk a, hemi ṭum hian mi pariat thiin midang 600 in hliam an tuar.

Tokyo-a pawikhawihna thleng vang hian Aum Shinrikyo pawl member eng emaw zat chu thubuai siamsak niin, an zinga 13 chu thi tura hremna pek an ni a, mi paruk chu dam chhung tang tura hrem an ni bawk.

Aum Shinrikyo hi sakhaw kalfawr pawl niin kum 1980 chhoa Hindu leh Buddhist rin dan behchhana din a ni a, a hnuah apocalyptic Kristian rin dan phung anga kalpui a ni leh a ni. An pawl hming awmzia hi 'thudik chungchuang' tihna a ni a, a dintu Shoko Asahar hian Krista leh Buddha hnua tihharha awm hmasa ber, 'englightened one' niin a inchhal a ni. Kum 1989 khan official-in sakhaw pawl anga ngaih a ni a, ram hrang hrangah zuitu pawh eng emaw zat a nei a ni.

Mahse he pawl hian an kalphung thlak chhoin, khawvel a tawp thuai dawn a, an pawl mi leh sate chauh an dam khawchhuak dawn niin a sawi. Kum 1995-a pawikhawihna an thlen hnuah an biru a, mahse a hnuah Aleph leh Hikar no Wa tih hmingin an awm zui leh a ni.

US leh ram dang eng emaw zatin Aum Shinrikyo hi firfiak pawlah a puang a, mahse Aleph leh Hikari no Wa chu sakhaw pawl hlauhthawm tak nia sawi ni mah se Japan-ah chuan dan ang tak an awm phalsak zui a ni.