SAfrica President-in Omicron vanga zin khapna siam hlip turin ngen

South Africa president Cyril Ramaphosa chuan coronavirus variant thar, Omicron vanga an ram leh a ram ṭhenawm ramte laka ram hrang hrangin zin luh khapna an siam chu hlip turin a ngen.

Ramaphosa chuan ram ṭhenkhatten zin luh khapna an siam nghal chuan a tilawm lo hle tih sawiin, khapna thupek an siamte chu hlip leh nghal turin a ngen. Hetianga khapna siamna chhan hi scientific taka hri laka invenna tur innghahchhan a tling lo a, Africa chu inthliarhranna tuartu a ni, a ti. Khapna an siam hian hri darh tur venna kawngah awmzia a neih a rin loh thu sawiin, "Zin khapna siam hian a tuartu ramte eibar zawnna a tichhiat belh theih bakah, hripui leng an hmachhawn ve theih na tur leh ngai an awh chhoh theihna kawngah pawh harsatna a thlen thei zawk dawn a ni," a ti.

Mahse Omicron variant vang hian ram eng emaw zat chuan South Africa ram aṭanga khualzin luh khapna thupek an siam tawh.

President Ramaphosa chuan Omicron variant rawn chhuak leh khawvela vaccine intluktlang taka sem a nih loh zia lantirtu a nih thu sawiin, mi zawng zawngin vaccine an lak vek hma chuan variant tam zawk a la rawn chhuak thei reng tih a sawi.

Omicron hi "variant of concern" huangah dah ni tawhin, zirchianna hmasa tarlan danin hri leng tawhte aiin inkaichhawn a awlsam zawk a ni. He hri inthlakdanglam chak tak hi tun thla tir khan South Africa ramah hmuhchhuah a ni a, kar liamta Nilaini khan World Health Organization (WHO) hnenah hrilh leh a ni.

South Africa-a Gauteng province-ah he variant thar kai hi kar hnih liam ta chhung khan eng emaw zat hmuh chhuah niin, tunah chuan ram chhunga province zawng zawngah hmuh a ni tawh.

WHO-in khapna siamtu ramte a dem
World Health Organigation (WHO) chuan Omicron variant vanga ram ṭhenkhatten hmanhmawh taka zin veivah khapna an siam nghal mai chu a dem thu sawiin, he hri chungchang hi hrechiang phawt turin a ti.

WHO Africa director Matshidiso Moeti chuan, "Khawvel hmun dang eng emaw zatah Omicron variant hmuh an nih tawh a, hetih laia Africa bik tinzawn chunga zin veivah khapna siamna hi khawvel inunauna tichhe thei thil a ni, " tiin a sawi.

"Zin khapna dan siam hian Covid-19 inkaichhawn theihna chu tlemin a tihniam mai thei a, mahse khawsakna leh ei zawnna kawngah nasa takin phurrit a siam phah a ni," tiin "Khuakhirhnate kenkawh a nih dawn chuan International Health Regulations-a tarlan angin scientific takin ṭanchhan an nei tur a ni a," a ti.