WTO-in ministerial meet neih tur ṭhulh

World Trade Organisation (WTO) chuan vawiina Geneva-a minsiterial level meet a neih tur chu Covid-19 hri thar, Omicron vanga ram eng emaw zatin zin veivah khapna an siam leh tak avangin a ṭhulh.

WTO chuan 12th Ministerial Conference (MC) neih tur chu ṭhulh a nih thu leh, neih hun tur chu la ngaihtuah chawp tur a nih thu a sawi.

Meeting neihna tur, Switzerland bakah Europe ram eng emaw zatin zin veivahna leh inkhunghrang chungchangah khuahkhirhna thar an siam leh avangin meeting hi an nei thei dawn lo tih General Council Chair ambassador Dacio Castillo (Honduras) chuan emergency meeting a kohah a sawi a ni.

Tun ṭum hi hrileng vanga 12th Ministerial Conference an ṭhulh ṭum hnihna a ni. He meeting hi nikum June thlaa Nur-Sultan, Kazakhstan-a neih tur a ni a, mahse hri leng vangin hei hi sawnin, Geneva-ah neih turin an ti a, mahse hei pawh hi ṭhulh a ngai leh ta a ni.