Myanmar sipai sorkarin NUG bond leitute manah a vau

Myanmar-a civil sorkar paihthlak a nih hnuah democracy thlawptuten civil sorkar aiawha an din, National Unity Government(NUG)-in bond sale a siam leitute chu sipai sorkar chuan manah leh firfiaka chetna thlawpna thubuaia siamsakah a vau.

NUG hian November 22 khan bond sale hi nei ṭanin, heta ṭanga an sum hmuhte hi sipai sorkar paihtlakna tura hmalakna atana an ti a ni. Bond sale hawn ṭanni hian USD maktaduai 6.3 man an hralh chhuak hman a, USD tluklehdingawn khat hralh chhuah an tum a ni.

NUG thupuangtu, Dr Sasa chuan bond sale an buatsaih hi ngaihventu an tam a, lei duh an tam zia an hmuh aṭangin mipuite chuan sipai rorelna rawng tak chu paithlak an duhzia a langchiang hle a ni, a ti. Bond hi USD 100, 500, 1,000 leh 5,000 ten kum hnih chhung atan an lei a, a leitute hian sum lamah hlawkpuina an nei hran lo. Mahse democracy sorkar a din theihna tura an hmalakna a nih avangin lei duh an tam a, an hralh tawh zinga a tam zawk hi ram danga Myanmar mi awmten an lei a ni.

Sipai sorkar chuan NUG bond lei hi firfiakte suma puihna tiin civil mite a vau a, bond leitute chu manah a vau. Sipaite hian NUG hi dan pawnah hnawlin, 'terrorist movement' tiin a lo puang tawh a ni. Hei vang hian NUG bond leitu, Myanmar mite chu terror act hnuaiah thubuai siamsak an ni dawn tih sipai sorkar thupuangtu chuan a sawi.