Mipui thlan rorelna ram thar ber Barbados ram a ding ta

Barados ram chu Queen Elizabeth II rorelna hnuaia awm tawh loin, mipui thlan rorelna ram a ni ta.

Thawhṭanni, November 29 zan khan Queen Elizabeth II chu an ram hotu lu ber a nih aṭanga paihin, hemi zan zanlai aṭangin Barbados chu khawvela mipui thlan rorelna ram, republic thar ber a ni ta a ni.

Official-a an ram hotu lu ber aṭanga Queen Elizabeth II paih a nih hnuah, an ram independence a puan champha vawi 55-na rualin zanlaiah Dame Sandra Mason chu an ram President atan lakluh nghal a ni. He hun hi Prince of Wales, Prince Charles leh Barbadian singer Rihanna-te pawhin an hmanpui a ni.

Thuneihna inthlakna lantirna tawpna atan British monachary zahna chibai hlan, 21 gun salute pek a nih hnuah Royal Standard flag chu la thlain Barbado flag-in thlak a ni ta a ni.

Prince Charles chuan ram pahnihte chuan constitution a danglam hnuah pawh inzawmna nghet tak an nei reng a ni tiin, Barbados ram tan bul ṭanna thar a ni a ti a, Barbados ṭhianṭha takah a inngaih chhunzawm zel tur thu a sawi. Hemi hnu hian President thar Mason chuan Prince Charles hi Order of Freedom Independnence award a hlan.

Barbados ram hian nikum khan mipui thlan rorelna ram an nih tur thu an lo puang tawh a, mahse Commonwealth-ah erawh an la awm chhunzawm zel ang.

President thar, Dame Sandra Mason hi kum 72 mi niin, kum 2018 aṭang khan governor-general a ni. October thla khan Parliament-ah President atan hian thlan a ni. Queen Elizabeth II thlakin Barbados ram hotu lu ber a ni ta a ni.

Queen pawhin duhsakna thawnin, Barbados ram chuan a thinlungah hmun pawimawh tak a luah reng tur thu a sawi.

Kum 1992 khan Indian Ocean island, Mauritius chuan an ram hotu lu ber aṭangin Queen Elizabeth II paihin, mipui thlan rorelna ramah an lo inpuang tawh bawk. Hetih lai hian Elizabeth II hi ram 15-ah Queen a la ni.