Myanmar court-in Suu Kyi thubuai tihfel hun tikhawtlai

Myanmar-a sipai court chuan nimin khan civil hruaitu an paihthlalk tak, Aung San Suu Kyi thubuai a ngaihtuah mekah thutluka hmasa ber tihchhuah hun tur chu December 6-ah a sawn.

Nobel Peace prize pawh lo dawng tawh, Aung San Suu Kyi hi February 1-a sipaiten civil sorkar thuneihna an hnehchhuh khan manin, thubuai hrang hrang a siamsak zui a ni. June thla aṭang khan a thubuaite hi court-ah ngaihtuah a ni a, mahse thubuai ngaihtuahnaah hian midangte tel phalsak an ni lo.

Thawhlehni khan natural disasters law hnuaia Covid-19 kaihhruaina dan bawhchhia leh, sipai rorelna dodal tura mipuite fuiha puhna chungchanga thubuai siamsak chungchangah court-in thutlukna a siam hun tur a ni. Mahse court lam hian thubuai ngaihtuah hun hi a chhan sawi chiang loin tikhawtlai a nih thu a puang.

Kum 76 mi Suu Kyi chuan a puhnate hi a pha a, a lamṭangte chuan thubuai siamsakte hi politics hmanga inbeihna vek a nih thu an sawi bawk.

Suu Kyi chungchang ngaihtuah hun tur tihkhawtlai a nih chungchangah sipai lam leh state media-te chuan thuchhuah engmah an nei lo a, Suu Kyi-i lawyer-te chu engmah sawichhuak lo tura thu pek an lo ni tawh bawk. Suu Kyi hi eiruk thubuai leh official secrets act bawhchhiaa puhna thubuai pawh siamsak a ni tel bawk a ni.

Sipaite'n thuneihna an chan hnuah Myanmar chuan buaina an tawk chho reng a, sipaite nawrh hauihawtte tihtawp tir tum mah se, democracy thlawptu lamte chuan sipai rorelna duh lohna hi an la lantir chhunzawm reng a ni.