Sweden hmeichhe PM hmasa ber a vawi hnihna atan thlang nawn

Sweden prime minister Magdalena Andersson chu PM aṭanga a ban hnu kar khat pawh a liam hmain thlan nawn leh a ni.

Social Democratic party hruaitu, Andersson hian kar liamta Nilaini khan darkar sarih chhung prime minister hna a chelh hnuah sorkar an siampui, Greens party-in sorkar an thlawpna an hnuhdawh avangin a bang zui nghal a ni. Parliament-ah sorkar budget pharh chu pawm loin, eptu party-te proposal siam chu pawm a ni . Eptu lam rawtna thlawptu zingah sorkarna an siampui, Green party hi an tel.

Thawhṭanni khan Parliament member-te chuan prime minister tur hi thlang ṭha lehin, Andersson bawk thlan nawn leh a ni. Social Democrats party hi Parliament-a party mala seat ngah ber niin, seat 349 awmah seat 100 an nei a, majority an neih phak loh vangin party dangte thawhpuiin ṭangrual sorkar an siam leh dawn a ni.