Russia-in Omicron variant vangin vaccine thar buaipui ṭan

Russia chuan khawvelah Covid-19 variant thar, Omicron hmuh chhuah a nih leh avangin he variant laka hman tlak tur Sputnik vaccine version thar siam hna an buaipui ṭan nghal.

Gamaleya National Research Center of Epidemiology and Microbiology chuan Thawhṭanni khan thuchhuah siamin, Sputnik V leh Sputnik Light vaccine-te chuan Omicron variant lakah hna an thawk em tih an zirchiang mek tih a sawi. Heng vaccine-te hi siam danglam a ngai a nih chuan ni 45 hnuah Sputnik Omicron version chu an siam peih tur thu an sawi. Nakkum kumtir lamah international market lamah Sputnik Omicron booster shot eng emaw zat pek chhuah theih an inbeisei bawk.

World Health Organisation (WHO) chuan khawvela Omicron variant a darh leh theihna a sang hle tih sawiin, he variant hmuh chhuah thar hi a inthlak danglam nasat tawh avangin nghawng na tak a neih pawh a hlauhthawnawm niin a sawi. Hemi rual hian he hri nihphung tak hi hriatchian loh tam tak a la awm a, mahse a ziarang aṭangin inkai awlsam tak, Covid-19 hri a darh leh vak theihna a ni thei tih a sawi a ni.