Thailand puka tangte hruaichhuah tumin thawk ṭan

Thailand puka tang, football club-a rawlthar rual 12 leh an coach te chu an tanna hmun aṭanga hruaichhuah tumn nimin aṭang khan hma lak ṭan a ni.

Mi 13-te hi Tham Luang pukah hian kar hnih chuang an tang tawh a, an awmna puk hi tuilianin a chim avangin hmuhchhuah an nih hnuah pawh hruaichhuah theih an ni mai lo a, tui hleuh leh tui chhung luh an thiam loh chuan hruaichhuah theih mai an ni lo tih an sawi. Mahse an zinga tumahin tuichen an thiam lo a, hei vang hian fur ruahtui tlak tawp hun, puka tui a kam hun nghah a ngai maithei nia sawi a ni.

Mahse ruah a sur chhunzawm zel avangin puk-a tangte awmna hmun hi tuilianin a chim theih mai dinmunah a ding dawn nia sawi a ni a, hei vang hian nimin aṭang khan rawltharte leh an coach te hruaichhuah tum hian tuilut thiamten an bei ṭan a ni. Chhanchhuah hna thawktute chuan puk hi tuiin a chim nasat avangin liluha inhruai chhuah chu thil hlauhawm tak a ni tih an sawi a, hei vang hian puk chuglam atangin an awmna zawn velah lei an verh a, hmun 100 velah, meter 400 vela thukah an verh tawh a ni. Rawlthar leh an coach te tanna hmun hi meter 600 vela thuk nia sawi a ni.

Puka tangte hi ni 10 chhung an chin hriat loha an awm hnuah British diver pakhat chuan an awmna hi hmuchhuakin, an hriselna dinhmunte pawh a ṭha nia sawi a ni. Hruaichhuah thei mai an nih loh avangin ei tur leh damdawi bakah an mamawh dangte pawh pekluh an ni a, anmahni puitu zinga pakhat Navy Seal diver hlui chu puka awmte tana oxygen bur a pek hnu, a kir lam chu amah zawk hi oxygen tlakchham vangin a chau a, damdawi-in panpui a nih hnuah a thi a ni.

Inrinni zan khan ruah a sur a, khaw chin zirtuten ruah a la sur chhunzawm zel dawn nia an sawi vangin thuneitute chuan puka tangte chhanchhuah hna hi kalpui thuai a ngai niin an sawi. Rescue chief leh Chiang Rai Governor Narongsak Osottanakorn chuan puka tangte hruaichhuah hna thawk tur hian a inpeih tih a sawi a, hun dang nghah a ngai lo tih sawiin hma an lak nghal mai loh chuan remchang an neihte bawhpelh a hlauhawm thu a sawi.

Narongsak Osottanakorn chuan puk chhunga awmte hruaichhuak tur hian tuilut thiam rual 18 tirh an nih thu a sawi. Puka tangte chu doctor-ten an hriselna dinhmun an enfiah hnuah an rilru leh taksa pawh an chak tawk a ni tiin, anmahni leh an chhungte pawhin a rang thei anga hruaichhuah an nih theihna turin inremna pawh an ziahpui vek niin a sawi.

Chhanchhuah hna thawktute chuan puk chhunga tui tlingte paihchhuah hna an thawk reng a, tui pawh hi a kiam sawt hle nia sawi a ni. Hei vang hian ruah a sur nasat leh hmaa chet lak vat a ngai niin Chiang Rai governor chuan a tarlang.