Japan-ah tuilian vangin mi 60 thi

Japan ramah ruahsur nasa vanga tuilianin chhiatna a thlenah mi 60 an thi tawh a, chin hriat lohin mi eng emaw zat an awm mek bawk.

Tuilian vanga thihna thleng tam zawk hi Hiroshima biala thleng a ni a, kar kalta Ningani aṭang khan he bialah hian ruah nasa takin a sur a, chenna in tam tak a chhe tawh bawk. Mi maktaduai 1.5 vel chu an in chhuahsan tura hriattir an ni a, midang maktaduai thum pawh a ṭul huna insawnchhuak thei tura inralring tura hriattir an ni bawk.

Thuneitute chuan tun ṭuma ruahsurin chhiatna a thlen chu hun rei tak chhunga ruahsur nasa avanga chhiatna an tawn rapthlak ber ani thei tih an sawi. Prime Minister Shinzo Abe chaun thuneitute chuan tuilian tuarte chhanchhuah leh sawnchhuah hna thawkin theihtawp an chhuah mek tih a sawi.

Tuilian tuarte chhanchhuah leh chhawmdawl hna hi police, fire-fighter leh sipaiten an thawk mek a ni.

Tokyo khawthlang lam km. 600 vela hla, Motoyama khuaah chuan Zirtawpni zing leh Inrinni zing inkarah khan ruah 583 mm a sur hman niin Japan meteorological agency chuan a sawi a, a la sur belh zel dawn niin a tarlang bawk.