Pakistan PM hlui kum 10 tang turin hrem

Pakistan National Accountability Bureau (NAB) court chuan an ram prime minister aṭanga paihthlak Nawaz Sharif-a chu eiruk thubuai chi thumah thiam loh chantirin kum 10 tang turin a hrem. A thubuaite hi London-a an chhungkaw hminga flat leia puhna kaihhnawihte an ni. A fanu, Mayram pawh kum sarih tang tur leh, a makpa Safdar chu kum khat tang tura hrem an ni bawk.

Kum 68 mi, Sharif-a hi a thubuai ngaihtuah lai hian a awm lo a, a nupui hrawk cancer enkawlin London-ah a awm mek a ni. He court thutlukna vang hian Pakistan prime minister ṭum thum lo ni thei tawh hi kum sawmli zet politics a lo luhchilh tawh tawpna tur nia ngaih a ni.

Sharif-a fanu, a pa aiawh chho thei tura mi rin ber Maryam pawh thiam loh chantir a nih vangin July 25-a an ram inthlanpui neih turah pawh chuh thei lo tura disqualify nghal a ni bawk.

Prosecution lawyer Sardar Muzaffar Abbasi chuan court thutlukna siam chuan Sharif-an London-a Avenfield apartment a leina sum chu sorkar sum a eiruk aṭang ngeiin a leh a ni tih a tichiang niin a sawi. Hetihlai hian Sharif-a chuan an puhna hi thu dik lo nia sawiin, court sang zawkah khin let a tum thu a sawi. A nupui dinhmun a ziaawm veleh Pakistan-ah kirin, a dikna hailang turin a bei dawn tih a sawi a, "A ṭul a nih chuan jail aṭang pawhin ka bei let zel dawn a ni", a ti.

NAB court hian Sharif-a hi dollar matkaduai 10.6 leh, Maryam hi dollar maktaduai 2.6 chawi turn a ti bawk a, London-a an in leite cu Pakistan sorkar hminga laksak turin a ti bawk a ni.