Thailand puk aṭangin mi pariat lachhuak tawh

Thailand-a Tham Luang Nang Non puk-a tang, Wild Boars soccer team ami rawlthar 12 leh an coach-te lakchhuah hna chu Pathianni khan thawh ṭan a ni. Pathianni khan mi pali chu him taka lakchhuah an ni a, hun eng emaw chen chawlh lailawk a nih hnuah nimin khan thawh chhunzawm leh niin, nimin tlai dar 6 thleng khan midang pali lakchhuah belh an ni. Hemi hnu hian chhanchhuah hna hi chawlh lailawk leh a ni.

Puka tangte lakchhuah hna hi a hautak a, puk chhung hi tuiin a chim avang leh, a kalkawngte a khawhrawk leh zim avangin thawh chak a har hle. Pathianni khan mi pali lakchhuah an nih hnuah oxygen tank-te dahkhah a ngaih avangin hun eng emaw chen hna hi chawlhsan lailawk a ni. Mi pali hruaichhuak tur hian diver thiam rualte chuan darkar riat chuang zet hun an hmang.

Nimin khan a thawh hnihna atan an ram huna chawhma dar 11-ah chhanchhuah hna hi thawh chhunzawm leh a ni. Puk aṭanga lakchhuahte hi Muang district-a Chiangrai Prachanukroh Hospital-ah helicopter-in hruai nghal an ni.

June 23 aṭanga puk-a tang, mi 13-te chin hriat loha ni 10 an awm hnuah British diver pakhatin an awmna hmun hi a va hmuchhuak a ni. Hmuhchhuah an nih hnuah pawh an tanna puk hi tuilianin ala chim avang leh, a lakchhuahna tur kawng hi a thui tham avangin tui kam hun nghah an tum a, mahse ruah a sur chhunzawm tak zel avangin an tanna hmun pawh hi tuilianin a chim mai hlauhawmin a awm a, hei vang hian thuneitute chuan an ruahman lawk aia hmain hruaichhuah hna hi an thawk ṭan ta a ni.

Puk-a tangte lakchhuah hna thawk tur hian tuilut thiam bik mi 90 an thawk a, heng zinga mi 40 chu Thailand mi niin, midang 50 chu ramdang mi an ni. Naupang pakhat hruaichhuah hna hi diver pahnihin an thawk a, an chhuahna kawngah hian hmun khawhrawk leh lung bang thim tak tak te paltlang a ngai a ni. Chhuahna kawnga a hautak lai ber chu kawng chanve vela 'choke spot' an tih chu a ni. Helai hmun hi a zim em avangin diver-te pawhin paltlang turin an air tank-te an lakthlak a, an inhlanchhawn a ngai hial.

Thailand puka football team leh an coach tang leh, chhanchhuah hna thawh hi khawvelin a ngaihven a, him taka chhanchhuah vek an nih theihna atan duhsakna leh fuihna thute an sawi nasa hle. FIFA president Gianni Infantino chuan puka tangte hi dam taka hruaichhuah an nih ngei an beisei thu sawiin, World Cup Final, Moscow-a neih tur chu a hmuna en turin a sawm nghal. World Cup Final hi Pathianni zan hian Luzhniki Stadium-ah khelh a ni dawn a ni. He sawmna hi Thai Football Associaton hnenah a thawn a ni.