Brexit Secretary David Davis a bang

United Kingdom (UK) Prime Minister Theresa May-in European Union (EU) aṭanga UK inlakhranna tur (Brexit) a kalpuina kawnga a thawhpui pawimawh tak, Brexit Secretary David Davis chu a bang.

David Davis hi Brexit Secretary atan hian kum 2016 khan ruat a ni a, EU aṭanga Britain inlakchhuah tumna kawnga inbiakna neihah pawh a hmala tur ber a ni. Davis-an banna a thehluh hnu lawk hian Junior minister Steven Baker pawh a bang ve nghal bawk.

PM May-i hnena banna lehkha a thehluhah, Davis chuan an policy leh thiltih dan aṭang chuan EU leh single market aṭanga EU inlakchhuah tumna chu a hlawhtlin hmel lo hle nia a lan thu a sawi a, sorkarin inbiakna a kalpui dan chu a ring tawk tawh lo niin a sawi. May-i chuan Davis-an an policy chungchangh a sawiselna chu a pawmpui lo tih a sawi a, hemi rual hian EU aṭanga inlakchhuahna tura a hna lo thawhna leh a inpek tawhna te avangin lawmthu a hrilh.

Conservative MP Peter Bone chuan Davis-a chu thu tlukna huaisen tak a siam avanga a fak thu sawiin, PM in Brexit chungchang a hming chauha a kalpui chu pawm theih a ni lo a ni, a ti. Labour Party chairman Ian Lavery chuan May-i chu thuneihna nei tawh loha a puh a, party hruaity Jeremy Corbyn chuan May-i chu Brexit tihhlawhtling thei lohah a puh bawk.