Delta variant aiin Omicron a hlauhawm thei : South African Disease Expert

Africa chhimlama Omicron coronavirus variant hmuhchhuah thar chu Delta variant luahlan tu anih theih mai theih thu South Africa-a communicable disease institute-a director chuan Thawhlehni khan a sawi.

Omicron vang hian khawvel ramte chu an inralring lawk hle a, vaccine dose kima la tawhte pawn awlsam taka an kai theih avang leh, World Health Organization-in awlsam taka inkaichhawn mai theih ani tih a sawi hnuah ramdangte hian Africa chhimlam aṭanga zin veivah khapna dante an tichhuak a ni.

"Hri inkaichhawn awlsam kawngah Delta khum leh luahlan thei an awm tih zawhna a awm ṭhin a, he variant thar hi a lo ni maithei a ni," tiin South Africa-a National Institute for Communicable Diseases (NICD) acting executive director Adrian Puren chuan a sawi. Omicron hi Delta variant aia inkaichhawn a awlsam zawk tih kan finfiah meuh chuan damdawi-ina enkawl ngai hri kai nasa takin an lo pungchho thei dawn a ni, a ti.

Puren chuan kar li chhungin scientist-te chuan vaccine-in Omicron laka mi a ven theih dan te, variant dangte aiin taksa a khawihchhe zawk em tih an hriatchian a ngai a ni tiin a sawi bawk.

South Africa rama Covid-19 kai enkawl ṭhintu doctor-te chuan Omicron variant kaite an enkawlh tawhte chu an na lutuk lo a; khuh ro, khawsik, leh zan lama thlan chhuak nasa an nei tih an sawi. Mahse mithiamte chuan he variant-in taksaa hna a thawh danah thutlukna engmah la siam lo turin an ti thung.

Omicron variant vang hian ram eng emaw zat chuan zin veivah kawngah khuahkhirhna an siam nghal a ni. South Africa leh World Health Organisation (WHO) chuan he variant nihphung tak hriatchian a nih hmaa ram ṭhenkhatin khuahkhirhna an siam nghal mai chu ṭha lo an tih thu an sawi a, mahse hetichung hian khuahkhirhna siam ram hi an pung zel thung.

Zin veivah chungchanga khuahkhirhna siam tawhte -

Israel
Israel chuan variant thar a darh tih an hriat aṭang khan an ramri an khar nghal. Israel hi Omicron variant vangin khawvel ram zingah zinchhuah khapna dan siamtu hmasa ber a ni. Kar liam ta Inrinni zanlai aṭangin rampawn aṭanga khualzin luh khapna hi siamin, ni 14 chhung atan an siam phawt a ni.

Japan
Japan pawhin ram dang mi bakah zirlai leh sumdawnna thila zinluh pawh an khap vek bawk. Japan sorkar chuan fimkhur thu hlaah ramri chu rei vak lo chhung chauh khar tum a nih thu an sawi. Japan hian November 8 aṭang khan zinchhuah khapna dan hi an lo thlahdul tawh a, mahse variant thar an hmuhchhuah leh hnuah khapna hi an siam thar leh ta a ni.

Australia
Australia chuan Africa ram chhimlam ram South Africa, Botswana, Namibia, Zimbabwe, Lesotho, Eswatini, Malawi leh Mozambique aṭangin Australia khua leh tui ni lo chu an luh a khap. Heng ram aṭanga Australia mi hawte pawh an inkhunghran phawt zel a ngai ang.

Canada
Canada-ah pawh Canada mi ni lo chu Mozambique, South Africa, Botswana, Zimbabwe, Lesotho leh Eswatini aṭanga an luh khap a ni. Canada mi hawte pawh sorkarin dan a siamte zawm vek tura tih an ni a, ram chhung an luh hmain Negative RT PCR test report nei tur leh, Canada an thlen veleh test nei leh tura tih an ni. Ni 14 chhung hotel-ah an inkhunghrang leh phawt a ngai bawk ang.

Italy
Italy hian ramri kharin, ni 14 liamta chhunga Botswana, Eswatini, Lesotho, Mozambique, Namibia, South Africa leh Zimbabwe tlawhtute chu an ramah luh an khap. Italy hian December 6 aṭangin Italian Green Pass an 'update' dawn tih an sawi.

Indonesia
Indonesia chuan ram dang aṭanga lutte ni thum chhung inkhung hrang tura thupek a lo siam tawh chu variant thar darh avangin ni sarihah a pawtsei. Indonesia hian rampawn khualzin leh ramchhung mi Botswana, Zambia, Malawi, South Africa, Zimbabwe, Mozambique, Eswatini, Angola, Namibia leh Hong Kong aṭanga lutte chungah khuahkhirhna dan khauh zawk a siam a ni.

Morocco
Africa hmar lam ram hian kar hnih chhung international flight thlawhtir an khap tawh. Morocco hian November 29 khan he thupek hi tichhuakin, Japan leh Israel dawta international flight khap ram pathumna an ni.

Netherlands
Omicron 'variant of concern' anga puan a nih hnuah Netherlands chuan Botswana, Eswatini, Lesotho, Namibia, Zimbabwe leh South Africa aṭanga thlawhtheihna luh khapna dan an siam. He zin khapna hi December 4 thleng a awh ang. He khapna hian heng ram aṭanga Dutch mi lut turte erawh a huam lo thung.

New Zealand
New Zealand chuan Africa ram pakua - South Africa, Namibia, Zimbabwe, Botswana, Lesotho, Eswatini, Seychelles, Malawi leh Mozambique-a zin leh heng ram aṭanga luh a khap. He dan hi November 28 aṭang khan hman ṭan kha a ni.

United States
Ram dangte ang bawkin, United States chuan South Africa, Botswana, Zimbabwe, Namibia, Lesotho, Eswatini, Mozambique, leh Malawi aṭanga luh khapna dan a siam. Mahse heng ram aṭanga America khua leh tui nihna neite erawh an luh a phalsak a, US an luh hmain Covid negative report an neih a ngai thung.