Taliban-te rorel hnuah Afghan security force hlui Chin hriat lohin mi tam tak an awm

Afghanistan-a Taliban-ten ro an rel hnuah, Afghan security force member, mi 100 chuang zet chu chin hriat lohin an awm tawh niin Human Rights Watch chuan a sawi.

HRW chuan Afghan sipai hlui, an chin hriat loha bote hi province pali thleng a ni tih sawiin, he thil Taliban-ten thuneihna an chan aṭanga thla hnih vela thleng niin a sawi bawk.

August thlaa Taliban-ten Afghanistan president Ashraf Ghani kaihhruai sorkar paihthla a, thuneihna an chan hnu khan sorkar hmasa hnuaia thawkte leh sipai official-te chu ngaihdam vek an nih tur thu an puang. Mahse hetichung hian sorkar hmasa hnuaia security force member leh Taliban sawisel ṭhintu, activist-te dinhmun hi a him lo hle a ni.

Thawhlehnia report an tihchhuahah, HRW chuan August 15 leh October 31 inkar khan Afghanistan-a province 34 zingah province pali - Ghazni, Helmand, Kandahar leh Kunduz-ahte security force hluite hi chin hriat lohin an awm tih a sawi. An zirchianna aṭangin heng province-a security force member hlui 53-te bo leh thih chungchangah Taliban-te chu a mawhphurtu ngei an ni, a ti.

Hetih lai hian Taliban thupuangtu Inamullah Samangani chuan mi rukbo leh thah chu an policy a ni lo tih sawiin, an pawl member zinga ṭhenkhatin anmahni thua dan lo lekkawh a, phuba lakna atan an lo that a nih chuan an hriatpui lo tih a sawi. He thil thleng hi sorkar chuan a ngaihven a, a chhui chiang dawn a ni, a ti. "Ngaihdamna thu kan puan tawh khan kan kengkawh ngei dawn a ni, " tiin a sawi.

Samangani chuan Taliban sorkar thar hnuaiah security system te a la ṭha tawk lo a, hei hi mi ṭhenkhatin remchangah an lo hmang niin a sawi. "Phuba lakna atana mi thah hi sorkar chuan a duh lo a ni," a ti.