Kum 2020-ah minute 2 danah naupang pakhat zelin HIV kai : UNICEF
World Aids Day, December 1-a hman ṭhin puala UNICEF-in report a tihchhuah tharah, kum 2020 khan khawvel pumah naupang nuai thum velin HIV an kai thar tih a tarlang a, minute hnih danah naupang pakhat zelin hri hi kai ang an ni.
Kum 2020 vek khan AIDS kaihhnawih vangin naupang nuai 1.2 an thi bawk a, minute nga danah naupang pakhat zelin he hri vang hian nunna an chan a ni.
HIV (human immunodeficiency virus) and AIDS (acquired immunodeficiency syndrome) Global Snapshot chuan khawvela Covid-19 hripui leng mek chuan HIV kaite tan harsatna a thlen zual tih a sawi. Hri leng vanga inkharkhipna leh khuahkhirhna hrang hrang siamte avangin HIV kaiten invenna leh treament service an lak pawh a bahlah phah a ni, a ti.
HIV hri chu kum 50 zet buaipui a ni tawh a, hetih laia khawvel huapa hripui leng vanga retheihna pung chho te, rilru lama harsatna leh naupang leh hmeichhe tihnawmnahna pung chho chuan he hri kai theihna hi a tipung zual niin UNICEF executive director Henrietta Fore chuan a sawi. Covid-19 hri leng buaipui anga HIV hri hi buaipui zui ve zel a nih loh chuan, AIDS avanga naupang thi an pung zel bakah HIV kai pawh an pung zel dawn a ni, tiin a sawi.